పెరిక విద్యార్థి వసతి గృహం బాలికల హాస్టల్ నిర్మాణం కోసం 2025 నవంబర్ 7న ఎల్.బి. నగర్ ప్రాంతంలో భూమి పూజ జరిగింది. 

బాలికల వసతి గృహ నిర్మాణం త్వరగా పూర్తి అయ్యేలా యుద్ధ ప్రాతిపదికన పనులు        

జూన్‌ - 2027 నుండి బాలికల వసతి గృహం ప్రారంభమయ్యేలా ప్రణాళిక

బాలికల విద్య, భద్రతకు అధిక ప్రాధాన్యత

 నిర్మాణంపై వసతి గృహ,రాష్ట్ర సంఘ ముఖ్యుల ప్రత్యేక సమీక్షా సమావేశం

ఖైరతాబాద్ : హైదరాబాద్ ఎల్బీనగర్ లో  నిర్మాణంలో ఉన్న  బాలికల వసతి గృహ పనులు శరవేగంగా పూర్తి చేసి 2027 జూన్ నెల నుండి హైదరాబాదులో చదువుకునే పెరిక కుల బాలికల వసతి  కల్పించడం ప్రారంభించాలని, అందుకు ఇప్పటినుండే పనులు వేగవంతం చేయాలని వసతి గృహ, రాష్ట్ర సంఘ ముఖ్యులు సమావేశమై నిర్ణయించారు.

2026 సెప్టెంబర్ 17న  ఖైరతాబాద్ వసతి గృహంలో  వసతి గృహ అధ్యక్షులు డాక్టర్ దొంగరి వెంకటేశ్వర్లు గారి అధ్యక్షతన తెలంగాణ రాష్ట్ర పెరిక కుల సంఘం అధ్యక్షులు ఘటిక విజయ్ కుమార్ గారు ముఖ్య అతిధిగా జరిగిన సమావేశంలో రాష్ట్ర గౌరవ అధ్యక్షులు మద్దా లింగయ్య గారు, వసతి గృహ గౌరవ అధ్యక్షులు శ్రీరాం దయానంద్ గారు, ప్రధాన కార్యదర్శి అచ్చా రఘు కుమార్ గారు, రాష్ట్ర సంఘం అసోసియేట్ అధ్యక్షులు సుంకరి ఆనంద్ గారు, పెరికకుల సంక్షేమ సమితి కోశాధికారి బోడకుంటి ప్రకాష్ గారు బాలికల వసతి గృహ బిల్డర్ తో సమీక్షా సమావేశంo నిర్వహించారు.

2027 జూన్ నుండి బాలికల వసతి గృహం అందుబాటులోకి

నిర్మాణాన్ని నిర్ణీత సమయంలో పూర్తి చేసి  2027 జూన్‌లో బాలికల వసతి గృహాన్ని ప్రారంభించేందుకు నిర్మాణ పనులను శరవేగంగా పూర్తి చేయాలని బిల్డర్ కు నాయకులు సూచించారు.

బాలికల వసతి గృహం ఇప్పటివరకు మూడు ఫ్లోర్ల నిర్మాణం పూర్తి చేసుకోగా, జరిగిన పనులపై సమావేశంలో సంతృప్తి వ్యక్తం చేశారు.

ఐదు అంతస్తుల నిర్మాణంలో 

గ్రౌండ్ ఫ్లోర్‌తో పాటు మరో నాలుగు అంతస్తులు నిర్మించాలని నిర్ణయించి, గ్రౌండ్ ఫ్లోర్ మినహా ప్రతి అంతస్తులో 8 గదులు, ప్రతి గదిలో ముగ్గురు విద్యార్థినులకు వసతి కల్పించాలని నిర్ణయించి బిల్డర్కు అందుకు సూచనలు అందించారు.

మౌలిక సదుపాయాలకు ప్రాధాన్యత

ప్రతి అంతస్తులో బాలికలకు ఎలాంటి ఇబ్బందులు కలగకుండా నీరు, విద్యుత్, పారిశుద్ధ్యం, భద్రత, అవసరమైన ఇతర మౌలిక సదుపాయాలు సమకూర్చేలా నిర్మాణం చేపట్టాలని బిల్డర్‌కు స్పష్టమైన సూచనలు చేశారు.

24 గంటల విద్యుత్ సౌకర్యం

విద్యార్థినుల చదువు,భద్రతను దృష్టిలో ఉంచుకొని విద్యుత్ అంతరాయం కలగకుండా 24 గంటల విద్యుత్ సరఫరా ఉండేలా ప్రత్యేక ట్రాన్స్‌ఫార్మర్ ఏర్పాటు చేయాలని నిర్ణయించారు. విద్యుత్ సరఫరాలో ఎప్పుడైనా అంతరాయం ఎదురైనా నిరంతర జనరేటర్ సౌకర్యం ఉండేలా చర్యలు తీసుకోవాలని నిర్ణయించారు.  బాలికలకు ఇబ్బందులు తలెత్తకుండా లిఫ్ట్ సౌకర్యం, ప్రతీ ఫ్లోర్లో  తగినన్ని టాయిలెట్లు, బాత్ రూమ్ లు నిర్మాణం చేపట్టాలని బిల్డర్ సూచించారు. 

నిర్మాణ నాణ్యతపై ప్రత్యేక దృష్టి

వేగంతో పాటు నిర్మాణ నాణ్యతకు కూడా అత్యంత ప్రాధాన్యత ఇస్తూ, భవనం దీర్ఘకాలం ఉపయోగపడేలా పటిష్టంగా నిర్మాణం ఉండాలని, నిర్మాణం విషయంలో రాజు పడవద్దు అని బిల్డర్ కు ఆదేశాలు అందించారు.

పెరిక కుల ఆడబిడ్డల ఉన్నత విద్యే మా సంకల్పం

ఈ సందర్భంగా వసతి గృహ అధ్యక్షులు డాక్టర్ దొంగరి వెంకటేశ్వర్లు గారు, రాష్ట్ర సంఘ అధ్యక్షులు గటిక విజయకుమార్ గారు మాట్లాడుతూ ఇది ఒక భవనం కాదని,

వందలాది పెరిక కుల ఆడబిడ్డల భవిష్యత్తుకు ఒక బలమైన పునాది అని, బాలికల విద్యే అభివృద్ధికి మార్గం అవుతుందని, పెరిక సమాజంలోని ఆడబిడ్డలు ఉన్నత విద్యను అభ్యసించి తమ భవిష్యత్తును తీర్చిదిద్దుకునేందుకు ఈ వసతి గృహం ఒక ఆత్మవిశ్వాసానికి, ఆత్మగౌరవానికి నిలయంగా నిలవాలన్నదే మా సంకల్పమని అన్నారు. త్వరితగతిన నిర్మాణం పూర్తి చేసి 2027 జూన్ నెల నుండి బాలికల వసతి గృహన్ని అందుబాటులోకి  తెస్తామని తెలిపారు.